Ka nisur në Pogradec edicioni i 16-të i Festivalit Ballkanik të Filmit dhe Kulinarisë, një aktivitet që për pesë ditë do ta kthejë qytetin liqenor në qendrën e kinemasë ballkanike. Mbi 60 filma nga vende të ndryshme të rajonit do të shfaqen në kinemanë e qytetit, ndërsa hyrja për publikun është e lirë.
Organizatorja Gerta Qyrku u shpreh se këtë vit festivali sjell prodhime të reja nga Ballkani, ndërsa si risi do të shfaqen edhe filmi “Komisari i Dritës” dhe dokumentari i regjisorit Mevlan Shanaj.
Ndërkohë, regjisori Eno Milkani theksoi se festivali nuk është vetëm një garë filmash, por edhe një mundësi për artistët e rajonit që të shkëmbejnë eksperienca dhe të krijojnë bashkëpunime të reja. Ai bëri të ditur se programi përfshin 10 kategori filmash, si dhe takime me emra të njohur të kinematografisë shqiptare, mes tyre edhe aktorin Vasjan Lami.
Pjesë e pandarë e festivalit prej 16 vitesh është edhe aktorja kosovare Velina Muçolli, e cila këtë vit merr pjesë së bashku me vajzën e saj, Andrën. Ajo e cilësoi festivalin si një nga aktivitetet më të dashura dhe vlerësoi lidhjen e veçantë që ka krijuar me Pogradecin ndër vite.
Festivali Ballkanik i Filmit dhe Kulinarisë do të vijojë deri më 27 qershor, duke sjellë për publikun një ndërthurje të filmit, kulturës dhe traditave të vendeve të Ballkanit, me pjesëmarrjen e artistëve, regjisorëve dhe aktorëve nga i gjithë rajoni.
