Në akset rurale të Bashkisë Pogradec, situata paraqitet e vështirë për qarkullimin e mjeteve si pasojë e reshjeve të dendura të borës dhe rrëshqitjeve të dherave.
Në njësitë administrative Dardhas, Trebinjë dhe Velçan, trashësia e dëborës ka kaluar mbi 20 cm, duke pamundësuar lëvizjen e mjeteve të vogla. Qarkullimi nga fshatrat drejt qendrave të njësive administrative kryhet vetëm me mjete të larta dhe me përdorimin e detyrueshëm të zinxhirëve.
Aktualisht, disa akse rurale vijojnë të jenë të bllokuara edhe për shkak të rrëshqitjes së dherave. I pakalueshëm mbetet aksi Kalivaç–Dunicë në njësinë Trebinjë. Në njësinë Proptisht, rruga e fshatit Zall Torrë është e bllokuar për mjetet, ndërsa rrëshqitje dherash janë evidentuar edhe në fshatrat Slabinjë dhe Selishtë. Në të njëjtën situatë ndodhet edhe rruga rurale e fshatit Laktesh në njësinë Velçan.
Sa i përket fshatrave të thellë të njësisë administrative Dardhas, konkretisht Niçë, Osnat, Stërkanj, Dërdushë dhe Lekas, lëvizja e mjeteve bëhet vetëm me zinxhirë.
Autoritetet lokale bëjnë me dije se janë angazhuar mjete për pastrimin e borës dhe hapjen e rrugëve. Megjithatë, për shkak të kushteve të vështira atmosferike, mbetet problematike dhënia e një zgjidhjeje të shpejtë për rrëshqitjet masive të dherave në akset rurale
