Detaje të reja kanë dalë në dritë lidhur me plagosjen e regjistruar në Korçë, ku një 23-vjeçar mbeti i lënduar pas një konflikti.
Sipas burimeve spitalore, i riu ka marrë një plagë në pjesën e barkut si pasojë e goditjes me mjet prerës, si edhe dëmtime në fytyrë të shkaktuara nga grushtimet. Mjekët bëjnë me dije se ai ndodhet jashtë rrezikut për jetën dhe po merr trajtimin e nevojshëm mjekësor.
Ndërkohë, policia ka arritur të identifikojë autorin e dyshuar të ngjarjes dhe ka nisur menjëherë kërkimet për lokalizimin dhe arrestimin e tij.
Nga të dhënat paraprake mësohet se konflikti dyshohet të ketë nisur për shkak të një borxhi prej 100 mijë lekësh të vjetra mes palëve.
Burime pranë hetimit bëjnë me dije se 23-vjeçari njihet në qytet si shitës automjetesh, ndërsa autori i dyshuar mendohet të jetë banor i fshatit Drenovë.
Policia po vijon veprimet hetimore për zbardhjen e plotë të rrethanave të ngjarjes dhe kapjen e autorit të dyshuar.
