Një raport i Kontrollit të Lartë të Shtetit ngre alarmin për mënyrën se si janë administruar financat dhe pasuritë publike në Bashkinë e Vlorës. Auditimi financiar për vitin 2025 evidenton një sërë problematikash serioze, duke vënë në pikëpyetje administrimin e të ardhurave, kontrollin e shpenzimeve, mbledhjen e detyrimeve dhe menaxhimin e aseteve të qytetit bregdetar.
Në raportin përfundimtar, KLSH evidenton plot 18 gjetje dhe 23 rekomandime, ndërsa përllogarit efektet negative të konstatuara në administrimin dhe menaxhimin e të ardhurave në vlerën 1 miliard e 244 milionë e 722 mijë lekë.
829 milionë lekë borxhe të papaguara ndaj bashkisë
Një prej problematikave më shqetësuese lidhet me detyrimet e papaguara nga bizneset, institucionet dhe abonentët familjarë. Në fund të vitit 2025, detyrimet progresive ndaj Bashkisë Vlorë arritën në 829 milionë e 623 mijë lekë.
Kjo shumë jo vetëm që nuk është mbledhur, por gjatë vitit 2025 detyrimet janë rritur me mbi 10.5 milionë lekë krahasuar me një vit më parë.
KLSH konstaton mangësi në administrimin e taksave dhe tarifave vendore, mungesë regjistrash të plotë dhe mungesë koordinimi mes drejtorive përgjegjëse. Për detyrimet e familjarëve, bashkia mbështetej në të dhënat e përcjella nga Ujësjellës-Kanalizime, pa kryer verifikimet e nevojshme për numrin e taksapaguesve dhe debitorëve.
402 milionë lekë gjoba të paarkëtuara
Një tjetër konstatim i rëndë lidhet me gjobat e vendosura nga Inspektorati i Mbrojtjes së Territorit të Bashkisë Vlorë.
Sipas KLSH-së, deri më 31 dhjetor 2025, 665 gjoba të papaguara kishin krijuar një detyrim prej 402 milionë e 10 mijë lekësh.
Për më tepër, audituesit kanë konstatuar se për gjobat e formës së prerë nuk ishin dokumentuar procedurat e nevojshme për ekzekutimin e detyrueshëm. Një situatë që ka lënë miliona lekë të qytetarëve dhe taksapaguesve të paarkëtuara.
18 pika karburanti pa licencë, bashkia nuk mori masa
KLSH ka zbuluar gjithashtu se nga 40 subjekte që ushtronin aktivitet si pika të shitjes me pakicë të karburantit në territorin e Bashkisë Vlorë, plot 18 prej tyre operonin pa licencën përkatëse.
Megjithatë, gjatë vitit 2025 nuk rezulton të jetë administruar dokumentacion për njoftimin e Inspektoratit Shtetëror Teknik Industrial për marrjen e masave dhe bllokimin e këtyre aktiviteteve.
Gjithashtu, gjashtë subjekte rezultonin debitore për 5 milionë lekë.
46 ndërtime pa paguar tarifat vendore
Probleme janë konstatuar edhe në arkëtimin e tarifave të pastrimit, gjelbërimit dhe ndriçimit.
Në 46 raste gjatë vitit 2025, subjekte të ndryshme kanë kryer punime ndërtimi në territorin e bashkisë pa iu aplikuar tarifat përkatëse. Si pasojë, buxhetit vendor i kanë munguar 4 milionë e 631 mijë lekë.
Edhe administrimi i hapësirave të plazheve rezulton problematik. Pesë subjekte nuk kishin paguar detyrimet e qirasë, duke krijuar një detyrim prej 2.4 milionë lekësh.
Buxheti realizohet vetëm 57%, investimet mbeten pas
Një tjetër tregues që bie në sy në raport është realizimi i buxhetit të Bashkisë Vlorë për vitin 2025, i cili rezulton vetëm në masën 57%.
Sipas audituesve, realizimin më të lartë e kanë pasur ndihma ekonomike, pagat dhe sigurimet shoqërore, ndërsa shpenzimet për mallra, shërbime dhe investime kanë pasur realizimin më të ulët.
KLSH vëren se planifikimi i shpenzimeve nuk është mbështetur në të ardhurat faktike të viteve të mëparshme, por në parashikime të të ardhurave nga taksat dhe tarifat vendore, të cilat nuk realizoheshin.
Pasuri publike të keqregjistruara dhe probleme me kontabilitetin
Raporti evidenton gjithashtu probleme të konsiderueshme në pasqyrimin e pasurive të bashkisë.
Sipas KLSH-së, 7 aktive në vlerën 96.5 milionë lekë dhe 30 aktive në vlerën 103.7 milionë lekë janë klasifikuar gabimisht në llogaritë kontabël.
Po kështu, pjesëmarrja e Bashkisë Vlorë në kapitalet e shoqërive aksionere ishte nënvlerësuar me 175.5 milionë lekë, ndërsa llogaria e garancive kontraktuale ishte mbivlerësuar me 51.9 milionë lekë.
KLSH jep opinion të kualifikuar për pasqyrat financiare
Një prej konstatimeve më domethënëse të auditimit është edhe opinioni i kualifikuar për pasqyrat financiare të vitit 2025.
Audituesit kanë arritur në përfundimin se pasqyrat financiare përmbanin gabime materiale, edhe pse jo të përhapura. Mes problematikave përmenden mungesa e krahasimit të vlerave kontabël të aktiveve me inventarin fizik dhe pasaktësitë në klasifikimin e tyre.
Përgjegjësia bie edhe mbi drejtimin e Bashkisë Vlorë
Raporti dhe rekomandimet e KLSH-së vendosin detyra të drejtpërdrejta për drejtuesin e institucionit dhe strukturat përgjegjëse, duke kërkuar masa për arkëtimin e qindra milionë lekëve, inventarizimin e pasurive publike dhe përmirësimin e kontrollit financiar.
Në krye të Bashkisë Vlorë aktualisht është Brunilda Mersini, e cila mori mandatin pas zgjedhjeve të pjesshme të nëntorit 2025.
Duhet theksuar se auditimi mbulon periudhën 1 janar – 31 dhjetor 2025, pra përfshin edhe periudhën përpara marrjes së detyrës nga Mersini. Megjithatë, raporti dhe rekomandimet e tij mbeten një sfidë konkrete për administratën aktuale, e cila duhet të japë llogari për zbatimin e tyre.
Shifrat e raportit janë një sinjal serioz për mënyrën se si janë administruar paratë publike në Vlorë. Mbi 829 milionë lekë detyrime të paarkëtuara, 402 milionë lekë gjoba të papaguara, 18 pika karburanti pa licencë dhe një buxhet i realizuar vetëm 57%. Këto janë konstatime zyrtare të KLSH-së që kërkojnë përgjigje dhe masa konkrete nga drejtuesit e bashkisë.
