Në qytetin e Ersekës është çelur ekspozita historike “Kujtesa e shtypur”, një udhëtim unik në rrugëtimin e shtypit shqiptar nga fillesat e tij deri në vitin 1944. Nën kujdesin e studiuesit Niko Kotherja, kjo ekspozitë sjell për herë të parë për publikun shqiptar materiale të rralla dhe autentike që dokumentojnë zhvillimin e gazetarisë dhe botimeve shqiptare ndër dekada.
Ekspozita prezanton periodikë të rëndësishëm të botuar brenda dhe jashtë Shqipërisë, duke nisur nga tradita e hershme e shtypit shqiptar me “L’Albanese d’Italia” të Jeronim de Radës, deri tek botime të njohura si “Flamuri i Arbërit”, “Albania”, “Drita” dhe “Koha”. Dokumente origjinale, fotografi, kupona abonimi dhe materiale arkivore sjellin një panoramë të plotë të përpjekjeve intelektuale, patriotike dhe kulturore të shqiptarëve përmes shtypit.
Studiuesi Niko Kotherja e vlerësoi ekspozitën si një rikthim të memories kombëtare, ndërsa analisti Mentor Nazarko e cilësoi atë si një kujtesë të gazetarisë së vërtetë dhe sakrificave të brezave të mëparshëm. Kryebashkiaku Erion Isai theksoi se kjo nismë kulturore rikthen vëmendjen tek rrënjët e shtypit shqiptar dhe rëndësia e tij në historinë kombëtare.
“Kujtesa e shtypur” shndërrohet kështu në një urë lidhëse mes brezave, duke sjellë në fokus historinë, identitetin dhe rolin e pazëvendësueshëm të shtypit në formësimin e ndërgjegjes shqiptare.
