Skënderbeu dhe Vllaznia kanë ndarë nga një pikë në përballjen e vlefshme për javën e dhjetë të Abissnet Superiore. Sfida e luajtur në Korçë u mbyll me rezultatin 1-1, në një ndeshje me raste të shumta shënimi dhe disa episode të diskutueshme në zonën e rreptësisë.
Skuadra korçare e nisi më mirë takimin, duke krijuar disa mundësi të pastra për shënim. Pas disa tentativave, ishte Bismark ai që zhbllokoi rezultatin në minutën e 31-të, duke dërguar topin në rrjetë pas një harkimi të Shkëmbit.
Në pjesën e dytë, Vllaznia u shfaq më kërkuese dhe arriti të rikthejë baraspeshën në minutën e 67-të. Kapiteni Bekim Balaj shënoi me kokë pas asistit të Muratajt, duke vendosur rezultatin 1-1. Goli u kundërshtua nga futbollistët e Skënderbeut, të cilët pretenduan për faull në aksionin që parapriu realizimin.
Ndeshja u shoqërua edhe me pretendime të shumta për penallti nga ana e shkodranëve. Në minutat 43, 44 dhe 85, Vllaznia kërkoi ndërhyrjen e gjyqtarit, por pas rishikimit me VAR loja vijoi pa u akorduar 11-metërsh. Edhe në minutat e fundit Balaj pretendoi për penallti pas një rrëzimi në zonë.
Pavarësisht rasteve të krijuara nga të dyja skuadrat deri në fund, rezultati mbeti i pandryshuar. Me këtë barazim, Skënderbeu ngjitet në kuotën e 11 pikëve, ndërsa Vllaznia numëron 9 pikë pas dhjetë javësh kampionat.
