Mijëra pushues vendas dhe të huaj që po kalojnë ditët e verës në Pogradec kanë shijuar një mbrëmje të veçantë artistike në Odeonin e qytetit. Koncerti “Atdheu im” solli në skenë emra të njohur të muzikës shqiptare, të cilët interpretuan këngë tradicionale dhe qytetare nga të gjitha trevat shqiptare.
Në koncert morën pjesë artistët Kastriot Tusha, Selami Kolonja, Enkelejda Arifi, Hysni Alushi dhe Nikollë Prelaj, të cilët përcollën për publikun një repertor të pasur me këngë nga veriu në jug të Shqipërisë, duke promovuar trashëgiminë muzikore shqiptare.
Artistët vlerësuan atmosferën e krijuar në Pogradec, duke e cilësuar publikun si një nga më të ngrohtët dhe më mikpritësit. Ata theksuan se koncerti mbart mesazhin e bashkimit përmes këngës shqipe dhe të ruajtjes së identitetit kombëtar.
Emocionet në skenë u shoqëruan me duartrokitjet e publikut, ku krahas qytetarëve pogradecarë ishin të pranishëm edhe shumë turistë vendas e të huaj, të cilët shijuan performancat artistike në një nga mbrëmjet kulturore të sezonit veror.
Koncerti “Atdheu im” është pjesë e një turneu artistik që synon të promovojë vlerat e muzikës shqiptare. Pas ndalesës në Pogradec, turneu do të vijojë në qytete të tjera të Shqipërisë, si edhe në Kosovë dhe Maqedoninë e Veriut, me synimin që kënga shqipe të jehojë në të gjitha trevat shqiptare.
