Më 5 qershor 2025, Spitali i Pogradecit shënoi 78-vjetorin e themelimit të tij, një përvjetor me rëndësi historike për qytetin dhe për të gjithë zonën e Liqenit. Pikërisht më 5 qershor 1947, është hapur spitali i parë publik në Pogradec, duke nisur një epokë të re të shërbimit shëndetësor për qytetarët.
Në kuadër të këtij përvjetori të veçantë, janë nderuar figura kyçe të mjekësisë pogradecare, si dhe është bërë një bilanc i arritjeve ndër vite, në drejtim të përmirësimit të kujdesit ndaj pacientit dhe profesionalizmit të stafit mjekësor. Kjo datë është një mundësi për të vlerësuar punën me përkushtim e sakrificë të mjekëve, infermierëve dhe gjithë stafit, që prej dekadash shërbejnë ditë e natë për shëndetin e komunitetit.
Në këtë përvjetor është bërë thirrje për të kujtuar dhe nderuar mjekët themelues të këtij institucioni, si dhe ata që nuk jetojnë më, por që lanë gjurmë të pashlyeshme në sistemin shëndetësor lokal.
“Spitali i Pogradecit mbetet një simbol i përkushtimit dhe humanizmit, një vlerë e qytetit që meriton respekt dhe vëmendje të vazhdueshme,” u shpreh një prej figurave mjekësore të njohura në qytet, Erton Katafili, gjatë këtij përvjetori.
