Temperaturat e larta të ditëve të fundit kanë sjellë një rritje të ndjeshme të vizitave në shërbimin e Pediatrisë në Spitalin e Korçës. Sipas mjekëve, çdo ditë paraqiten deri në 45 fëmijë me probleme gastrointestinale, kryesisht të vjella, diarre dhe në disa raste temperaturë.
Shefi i Shërbimit të Pediatrisë, Robert Rado, bën thirrje për kujdes të shtuar nga prindërit gjatë kësaj periudhe, duke këshilluar shmangien e ekspozimit të fëmijëve në orët më të nxehta të ditës, konsumimin e ushqimeve të sigurta dhe respektimin e rregullave të higjienës personale.
Mjekët rekomandojnë që, në rast të shfaqjes së simptomave, prindërit të kontaktojnë fillimisht mjekun e familjes, i cili ndjek ecurinë e gjendjes. Në rastet kur simptomat përkeqësohen ose kërkojnë trajtim të specializuar, fëmijët referohen në urgjencë ose në repartin e Pediatrisë.
Aktualisht, në Pediatrinë e Spitalit të Korçës janë të shtruar 11 fëmijë. Bluzat e bardha u bëjnë apel prindërve të mos neglizhojnë shenjat e dehidratimit dhe simptomat gastrointestinale të vazhdueshme, pasi ndërhyrja në kohë është thelbësore për shmangien e komplikacioneve.
