Rozeta Dobi, e njohur si pastruesja që u dënua për vjedhjen e qindra mijëra eurove nga banesa e ish-zyrtares së lartë të shtetit, Alda Klosi, është liruar këtë të martë nga burgu i grave në Pojskë, pasi përfitoi nga amnistia penale.
Dobi u arrestua në janar të vitit 2023, pasi akuzohej për vjedhjen e 120 mijë eurove, 30 mijë dollarëve amerikanë dhe sendeve me vlerë nga banesa e Klosit, ku kishte punuar si pastruese për rreth pesë vite.
Gjatë hetimeve, policia ushtroi kontroll në banesën e saj, ku u gjetën dhe u sekuestruan 404 mijë euro, 8 500 dollarë amerikanë dhe bizhuteri floriri të fshehura në tubin e aspirimit. Po ashtu, u sekuestruan edhe 58 150 euro, 7 mijë dollarë, 368 mijë lekë të rinj dhe tre automjete, dy prej të cilave dyshohej se ishin blerë me paratë e përfituara nga aktiviteti kriminal.
Ngjarja shkaktoi reagim të gjerë publik, jo vetëm për shumën e konsiderueshme të parave të sekuestruara, por edhe për hetimet që u zhvilluan më pas lidhur me origjinën e tyre.
Pas vuajtjes së një pjese të dënimit, Rozeta Dobi ka rifituar sot lirinë, duke u bërë një nga përfitueset e amnistisë penale.
