Dy vite pas vrasjes së 42-vjeçarit Egli Proga, Prokuroria pranë Gjykatës së Korçës ka përfunduar hetimet paraprake dhe ka dërguar për gjykim dosjen penale ndaj pesë personave të përfshirë në këtë çështje.
Sipas organit të akuzës, Denis Meçe dhe Leonidha Guçe do të përballen me akuzën e “vrasjes me dashje, të kryer në bashkëpunim”, ndërsa Arjan Manellari, Voltan Shkulaku dhe Andi Shkulaku akuzohen për moskallëzim të krimit dhe kryerje të veprimeve që pengojnë zbulimin e së vërtetës, vepra penale të kryera në bashkëpunim.
Për dy të akuzuarit kryesorë, Gjykata e Korçës ka lënë në fuqi masën e sigurisë “arrest në shtëpi”, ndërsa tre të pandehurit e tjerë vijojnë të jenë nën masën “detyrim paraqitjeje”.
Sipas aktit të ekspertimit mjeko-ligjor, Egli Proga humbi jetën si pasojë e një hemorragjie cerebrale të shkaktuar nga një goditje me grusht në kokë. Për të mbështetur akuzën, Prokuroria është bazuar në ekspertizën mjeko-ligjore, dëshmitë e personave të pyetur gjatë hetimit, pamjet e kamerave të sigurisë së bizneseve pranë vendit të ngjarjes, si dhe prova të tjera të administruara gjatë procesit hetimor.
Ngjarja ndodhi në mbrëmjen e 10 gushtit 2024 në Pogradec dhe shkaktoi reagime të forta në opinionin publik. Fillimisht, çështja u hetua me një tjetër kualifikim penal, por pas administrimit të provave të reja dhe përfundimit të ekspertizës mjeko-ligjore, akuza u rikualifikua në “vrasje me dashje”.
Gjatë dy viteve të fundit, familjarët e Egli Progës kanë organizuar protesta dhe kanë kërkuar zbardhjen e plotë të ngjarjes, duke kërkuar që hetimet të përfshijnë edhe mënyrën e reagimit të institucioneve, veçanërisht të strukturave të policisë lokale, në orët e para pas krimit.
Me dërgimin e dosjes në gjykatë, çështja hyn tashmë në fazën e gjykimit, ku pritet të shqyrtohen provat e mbledhura nga Prokuroria dhe pretendimet e palëve.
