Edicioni i nëntë i MIK Festival vijoi mbrëmjen e së dielës me një nga netët më të veçanta të programit artistik. Në Polin e Eventeve në Drenovë u zhvillua “Mbrëmja e Yjeve të Baletit”, ku në skenë u ngjitën balerinë të njohur shqiptarë, pjesë e trupave prestigjioze evropiane, artistë të huaj, si edhe solistë të Teatrit Kombëtar të Operës dhe Baletit.
Mbrëmja u kurorëzua me interpretimin e divës së muzikës shqiptare, Inva Mula, e cila solli emocione të forta për publikun e shumtë të pranishëm.
Sopranoja Inva Mula e cilësoi këtë si një nga netët më të bukura të MIK Festivalit, duke vlerësuar nivelin artistik të baletit dhe përzgjedhjen e programit.
Edhe balerina Anbeta Toromani u shpreh e emocionuar për atmosferën e krijuar, duke theksuar se artistët dhanë maksimumin në skenë dhe se bashkëpunimi mes artistëve shqiptarë e të huaj ishte i shkëlqyer.
Violonçelistja Juliana Laska e përshkroi koncertin si një natë magjike, ndërsa veçoi emocionin e interpretimit në vendlindje, mes natyrës dhe tingujve të zogjve.
Për balerinën franceze Irene Savary, kjo ishte vizita e parë në Shqipëri. Ajo e cilësoi eksperiencën fantastike dhe vlerësoi skenën e ngritur në natyrë si të mrekullueshme.
Ndërsa solistja e parë Adela Muçollari e përshkroi mbrëmjen si “qershia mbi tortë” për baletin, duke theksuar se artistët shqiptarë janë ambasadorët më të mirë të vlerave të vendit.
MIK Festival ul siparin këtë të hënë me dy aktivitetet e fundit artistike. Njëri koncert do të zhvillohet në Kishën e Shën Kollit në Hocisht, ndërsa mbrëmja përmbyllëse do t’i dedikohet serenatave korçare në Parkun “Rinia” në Korçë.
