Në skenën e Teatri Andon Zako Çajupi janë rikthyer emocionet e muzikës helene përmes koncertit “ZORBA”, një mbrëmje artistike kushtuar veprës së kompozitorit legjendar Mikis Theodorakis.
Interpretimi i këngëve u soll me ndjeshmëri nga Artur Vera, i shoqëruar në piano nga Erita Ibrahimi dhe në buzuk nga Panagiotis Lympanovnos. Një dimension i veçantë i koncertit ishte ndërthurja e muzikës me poezinë, ku aktori korçar Xhuliano Brisku solli në shqip vargje që pasqyronin shpirtin e këngëve të Theodorakis.
Gjatë koncertit, artistët vlerësuan mikpritjen e publikut korçar dhe lidhjen e fortë kulturore mes Shqipërisë dhe Greqisë. Ata theksuan se Korça mbetet një nga qytetet më artdashëse në vend, ku muzika e huaj pritet me ngrohtësi dhe interes të madh.
Në këtë frymë u shpreh edhe Konsulli i Përgjithshëm i Greqisë në Korçë, Asterios Bouzias, i cili nënvizoi se arti dhe muzika nuk njohin kufij dhe se aktivitete të tilla shërbejnë për të afruar edhe më shumë popujt.
Koncerti “ZORBA” nuk ishte vetëm një homazh për muzikën e pavdekshme të Theodorakis, por edhe një dëshmi e gjallë e fuqisë së artit për të bashkuar kultura dhe për të krijuar ura komunikimi përtej gjuhës dhe kufijve. Korça, edhe një herë, konfirmoi se e jeton artin me pasion dhe e kthen atë në një pjesë të identitetit të saj kulturor.
