Një nga momentet më të rëndësishme në historinë e krishterimit dhe të vetë kontinentit evropian është padyshim Reformacioni Protestant, një lëvizje që sfidoi autoritetin e Kisha Katolike dhe solli një mënyrë të re të të kuptuarit të besimit.
Ngjarja nisi në vitin 1517, kur murgu dhe teologu gjerman Martin Luther publikoi 95 tezat e tij. Në to ai kundërshtonte praktika të kohës, si shitja e indulgjencave dhe abuzimet brenda kishës. Ajo që fillimisht ishte menduar si një debat teologjik, u shndërrua shpejt në një lëvizje të gjerë reformuese që përfshiu gjithë Evropën.
Thelbi i Reformacionit solli ide të reja për kohën: besimi nuk fitohej përmes ndërmjetësimit njerëzor apo pagesave, por përmes një marrëdhënieje personale me Zotin dhe mbështetjes tek Bibla si autoriteti më i lartë shpirtëror. Kjo qasje u përqafua nga shumë besimtarë dhe çoi në lindjen e kishave protestante, duke ndryshuar përgjithmonë hartën fetare të Evropës.
Ndikimi i Reformacionit shkoi përtej fesë. Ai ndikoi në zhvillimin e arsimit, përhapjen e librave dhe përkthimin e Biblës në gjuhët kombëtare, duke u dhënë njerëzve mundësinë ta lexonin vetë. Megjithatë, kjo periudhë u shoqërua edhe me përçarje dhe konflikte të ashpra, që në disa raste u kthyen në luftëra fetare.
Sot, trashëgimia e Reformacionit vazhdon të jetë e gjallë në mbarë botën përmes komuniteteve protestante, të cilat theksojnë besimin personal, lirinë shpirtërore dhe kthimin tek mesazhi i thjeshtë i Ungjillit.
Reformacioni mbetet një pikë kthese historike, një moment kur besimi nuk ishte më vetëm institucion, por u kthye në një përjetim personal për miliona njerëz.
