Teatri “Andon Zako Çajupi” në Korçë u kthye në skenën e zërave të rinj lirikë, me zhvillimin e Festivalit Mbarëkombëtar të Këngëtarëve Lirikë “Tefta Tashko Koço” për shkollat e mesme të muzikës.
Në këtë edicion, festivali mblodhi në qytetin juglindor të rinj të talentuar nga Shqipëria, Kosova dhe Maqedonia e Veriut, të cilët sollën interpretime artistike në një konkurrim që promovon vlerat më të mira të muzikës lirike shqiptare.
Përmes performancave në skenën korçare, pjesëmarrësit jo vetëm garuan mes tyre, por edhe përcollën emocion, kulturë dhe pasion për artin vokal, duke dëshmuar se tradita e këngës lirike vijon të mbetet e gjallë tek brezat e rinj.
Drejtues të institucioneve artistike dhe përfaqësues të kulturës vlerësuan rëndësinë e këtij festivali si një urë lidhëse mes shkollave të muzikës në hapësirën shqiptare, por edhe si një mundësi për të evidentuar artistët e së ardhmes.
Festivali “Tefta Tashko Koço” rikthen një traditë të vyer për Korçën, qytet që historikisht ka qenë vatër kulture dhe pikënisje për shumë emra të njohur të skenës shqiptare.
Ky aktivitet synon të mbajë gjallë trashëgiminë e muzikës lirike dhe ta rikthejë Korçën në një qendër të rëndësishme të artit dhe kulturës kombëtare.
