Kryetari i Këshillit të Qarkut Korçë, Petrika Tollkuci, ka uruar aktorin e mirënjohur të teatrit dhe kinematografisë shqiptare Koco Qëndron me rastin e 99-vjetorit të lindjes.
Përmes një vizite në banesën e artistit, Tollkuci e cilësoi Koço Qendron si një histori të gjallë të artit korçar dhe shqiptar, duke vlerësuar kontributin e tij të jashtëzakonshëm ndër vite në skenën teatrore dhe në kinematografi.
Në mesazhin e tij, kryetari i Këshillit të Qarkut kujtoi se Koço Qendro, i lindur në Senicë të Delvinës, mori pjesë që në moshë të re në Luftën Nacionalçlirimtare në qarkun e Korçës dhe më pas u bë pjesë e Estradës së Maliqit në fillim të viteve ’60. Më vonë ai iu bashkua trupës së teatrit të Korçës, ku interpretoi një sërë personazhesh që lanë gjurmë në artin shqiptar.
Edhe pse në një moshë të thyer, aktori vazhdon të mbetet i lidhur shpirtërisht me skenën dhe artin, ndërsa gjatë takimit ka ndarë kujtime dhe histori nga vitet e arta të teatrit shqiptar.
Në emër të Këshillit të Qarkut Korçë, Petrika Tollkuci i akordoi Koço Qendros titullin “Ambasador i Qarkut”, si vlerësim për kontributin dhe përcjelljen e vlerave të jashtëzakonshme në teatër dhe kinematografi.
