Në qytetin e Korçës, vitet e fundit është rritur ndjeshëm interesi për restaurimin e banesave mbi 100-vjeçare, duke i kthyer ato në një aset të rëndësishëm për trashëgiminë kulturore dhe zhvillimin e turizmit.
Shumë prej këtyre banesave karakteristike po restaurohen me kujdes për t’u shndërruar në bujtina që mirëpresin turistë vendas dhe të huaj, ndërsa të tjera vazhdojnë të shërbejnë si banesa familjare. Pronarët po tregojnë gjithnjë e më shumë vëmendje në ruajtjen e elementëve origjinalë të ndërtimit, si portat, dyert dhe dritaret prej druri, duke ruajtur identitetin autentik korçar.
Restauratori i punimeve të drurit, Engjëll Bregu, shprehet se kërkesa për restaurimin e elementeve tradicionale është rritur ndjeshëm. Sipas tij, pronarët synojnë të ruajnë pamjen e jashtme të banesave ashtu siç kanë qenë dekada më parë, duke konservuar çdo detaj origjinal ose duke rikrijuar pjesët e dëmtuara sipas modelit të vjetër.
Bregu thekson se këto restaurime janë procese të ndërlikuara, që kërkojnë kohë, mjeshtëri dhe teknika të veçanta, pasi shumë prej elementeve të drurit mbartin ndikime arkitekturore të ardhura një shekull më parë nga vende si Italia apo Greqia, duke i dhënë Korçës një identitet unik urban.
Vetëm gjatë viteve të fundit, në Korçë janë dhënë mbi 150 leje ndërtimi për restaurimin e banesave të vjetra. Ky trend jo vetëm po ndihmon në ruajtjen e trashëgimisë arkitekturore të qytetit, por po kthehet edhe në një motor të rëndësishëm për zhvillimin e turizmit kulturor. Në këtë mënyrë, Korça po ruan historinë e saj, duke e përshtatur atë me kërkesat e kohës.
