Interesi i prindërve për programet afterschool vijon të jetë i lartë edhe në juglindje të vendit. Në qarkun e Korçës, aktualisht janë 35 shkolla pjesë e këtij programi, ndërsa në të gjithë territorin rajonal numërohen rreth 120 shkolla.
Programet pas shkollore u krijojnë mundësi nxënësve të qëndrojnë në ambientet e shkollës edhe pas përfundimit të orarit mësimor. Gjatë kësaj kohe, ata mbështeten për përfundimin e detyrave të shtëpisë, ndërsa angazhohen edhe në aktivitete që synojnë zhvillimin e talenteve dhe aftësive të tyre.
Drejtorja e Drejtorisë Rajonale të Arsimit Parauniversitar Korçë, Vinçola Rrota, thotë se kërkesa nga prindërit ka qenë e konsiderueshme.
“Interesi i prindërve ka qenë i madh për të qenë fëmijët e tyre pjesë e programeve pas shkollore. Të gjithë prindërit janë të interesuar që fëmijët e tyre të jenë deri diku të kontrolluar, por edhe të kenë mundësi të zhvillojnë ato talente të cilat nuk mund të zhvillohen gjithmonë brenda një ore mësimi.”
Programi shihet si një mbështetje e rëndësishme edhe për prindërit që janë në marrëdhënie pune. Fëmijët qëndrojnë në kujdesin e mësuesve, përfundojnë detyrat dhe zhvillojnë aktivitete të ndryshme, duke u rikthyer në shtëpi pasi kanë mbyllur një pjesë të angazhimeve shkollore.
Një prind e konsideron programin një lehtësi të madhe për familjet që punojnë.
“Është një iniciativë shumë e mirë për ne si prindër, sepse jemi në marrëdhënie pune dhe, në momentin që ne shkojmë në punë, fëmija ka kryer detyrat dhe ka qëndruar në shkollë. Vjen në shtëpi dhe ne thjesht kryejmë obligimet tona, pa u marrë përsëri me detyrat e fëmijës.”
Për zhvillimin e këtyre programeve mund të aplikojnë disa kategori mësuesish dhe profesionistësh. Përfshihen mësuesit që janë aktualisht në sistem, mësuesit e papunësuar të regjistruar në portal, mësuesit në pension, si dhe persona që aplikojnë përmes dosjes.
Sipas Rrotës, personat që përzgjidhen pajisen me certifikatë që i autorizon për zhvillimin e programeve pas shkollore.
Programet përfshijnë pesë fusha të ndryshme. Për nxënësit nga klasa e parë deri në të pestën, aktivitetet kombinojnë mbështetjen për detyrat e shtëpisë me artet dhe zejet. Ndërsa për nxënësit nga klasa e gjashtë deri në të dymbëdhjetën, fokusi vendoset te programet e arteve dhe zejeve.
Afterschool synon kështu të ofrojë një alternativë edukative pas përfundimit të mësimit, duke kombinuar kujdesin ndaj nxënësve, mbështetjen në procesin mësimor dhe zhvillimin e aftësive të tyre krijuese.
