Bashkia e Korçës është duke përfunduar rikonstruksionin e një godine e cila do të shërbejë për strehimin e qenve endacakë, si për për trajtimin e sterilizimin e tyre.
Kjo qendër ndodhet në rrugën e Voskopojës brenda bazës prodhuese të shkollës bujqësore.
“Kemi rikonstruktuar një hapësirë, e cila do të shërbejë si një qendër për strehimin e qenve endacakë, me kapacitet të caktuar. Së dyti, jam duke bërë procedurën për të siguruar mjetet për t’i kapur qentë endacakë, ampula dhe preparatet e tjera që duhen, dhe do të fillojnë procesin e kontrollit me një veteriner dhe vendosjes te qendra e mbajtjes,” deklaroi kryetari i Bashkisë Korçë, Sotiraq Filo.
Kryebashkiaku ka pranuar se deri më tani përpjekjet e Bashkisë nuk kanë qenë shumë të suksesshme sa i takon çështjes së qenve endacakë, por një gjë e tillë, sipas tij, vjen edhe për shkak se tufa qensh lëshohen herë pas here në qytetin e Korçës nga qytete të tjera, ndërsa edhe nga shoqatat që operojnë në këtë fushë, deri më sot nuk ka pasur ndonjë angazhim real për zgjidhjen e problemit.
“Fatkeqësisht më duhet ta them që bashkëpunimi apo gatishmëria me vepra ka qenë zero. Pra, nuk kemi asnjë rast të vetëm të këtyre shoqatave që të ofrohen dhe të japin një kontribut sado modest në adresimin e kësaj problematike. Që të zgjidhet problemi duhet parë edhe si të minimizohet numri i qenve të rrugës. Kemi konstatuar që në shumë raste këta qen sillen edhe nga bashki apo zona të tjera,” shtoi z. Filo.
Qendra për trajtimin dhe strehimin e qenve endacakë ka një kapacitet deri në 50 qen. Ata do të trajtohen e sterilizohen nga mjekë veterinerë, ndërsa Bashkia është aktualisht duke siguruar mjetet e nevojshme për kapjen dhe trajtimin e këtyre qenve endacakë.
