Pasi asnjë kandidat nuk arriti të kalojë filtrin e “garës së hapur”, Partia Demokratike ka shpallur me krenari përfundimin e përgatitjeve për referendumin madhështor të 23 majit, ku anëtarësia do të ketë mundësinë historike të zgjedhë mes, Sali Berishës dhe Sali Berishës.
Megjithatë, edhe pse alternativa në fletën e votimit është vetëm një kandidat, përfaqësuesit e partisë nuk ngurojnë që ta trumbetojnë këtë proces si më demokratikët që zhvillohet në parti.
Sekretari për Çështjet Ligjore në PD, Ivi Kaso, njofton sërish se procesi do të zhvillohet sipas standardit demokratik “1 anëtar, 1 votë”. “Në emër të Komisionit të Organizimit dhe Kontrollit të Operacioneve Elektorale, njoftojmë se gjithçka është gati për ushtrimin demokratik të 23 majit”, deklaroi ai, duke e cilësuar procesin si referendum, ndonëse më shumë ngjan me një ceremoni konfirmimi.
Kaso e përshkroi procesin si një “ushtrim demokracie”, ndërsa nuk kursen as statistikat e tjera duke thënë se PD ka zhvilluar plot 7 procese zgjedhore të hapura dhe demokratike që prej Rithemelimit, aq të hapura sa këtë herë nuk mbeti askush tjetër brenda për të kandiduar.
Sipas tij, në të 77 degët e partisë do të ngrihen qendra votimi, të hapura nga ora 08:00 deri në 18:00, ndërsa në degët më të mëdha do të ketë më shumë se një qendër votimi.
Kujtojmë se në garën për kreun e PD-së kishin shfaqur interes Ervin Salianji, Mereme Sela, Vladimir Mulaj, Alesia Balliu dhe Evi Kokalari, por kandidaturat e tyre u refuzuan, me arsyen se nuk plotësonin kriteret.
Ndërkohë, Salianji depozitoi një kërkesë në Kryesinë e PD-së dhe Komisionin e Apelimit, duke pretenduar se kandidatura e tij është penguar në mënyrë të paligjshme dhe se dokumentet e dërguara fizikisht, me postë dhe email kanë patur fatin e shumë mesazheve të tjera në politikë: janë parë, por jo lexuar.
