Tingujt autentikë të muzikës popullore shqiptare kanë pushtuar për dy netë me radhë Leskovikun dhe Ersekën, ku u zhvillua edicioni i 14-të i Festivalit Kombëtar të Sazeve Popullore. Në këtë aktivitet morën pjesë 12 grupe folklorike nga treva të ndryshme të Shqipërisë, si dhe grupe të ftuara nga Struga dhe Kosova.
Festivali, i cili tashmë është kthyer në një traditë të rëndësishme kulturore për Kolonjën, synon ruajtjen dhe promovimin e trashëgimisë jomateriale shqiptare, duke i dhënë një vëmendje të veçantë sazeve popullore dhe transmetimit të tyre te brezat e rinj.
Drejtoresha e Qendrës Kombëtare të Veprimtarive Tradicionale, Erilda Selaj, u shpreh se festivali mbetet një platformë e rëndësishme për promovimin e muzikës tradicionale shqiptare dhe për trashëgiminë e saj ndër breza.
Artistët pjesëmarrës, me dekada eksperiencë në skenën e muzikës popullore, vlerësuan rëndësinë e këtij festivali në ruajtjen e identitetit kulturor dhe në përcjelljen e traditave te të rinjtë, pavarësisht sfidave që sjell emigracioni dhe ndryshimet shoqërore.
Përmes tingujve të sazeve, valleve dhe këngëve që mbartin historinë e krahinave shqiptare, Festivali Kombëtar i Sazeve riktheu edhe një herë vëmendjen te pasuria e kulturës sonë popullore. Një ngjarje që jo vetëm kujton të shkuarën, por synon ta mbajë atë të gjallë si pjesë të identitetit dhe krenarisë kombëtare.
