Ka nisur për të nëntin vit radhazi MIK Festival, eventi ndërkombëtar i muzikës që sjell në Korçë dhe Devoll artistë të njohur nga Shqipëria dhe bota, duke e kthyer rajonin në një qendër të rëndësishme të artit dhe kulturës.
Organizatorja e festivalit, sopranoja e njohur Inva Mula, tha se këtë vit MIK Festival vjen me një program krejt ndryshe, duke zgjeruar skenat dhe zhanret muzikore.
Sipas saj, për herë të parë festivali hapet me muzikë xhaz, ndërsa programi përfshin edhe homazhe për regjisorin Viktor Gjika dhe shkrimtarin Teodor Laço, një mbrëmje baleti në Drenovë nën dritën e hënës, si edhe koncerte në Hocisht dhe Parkun “Rinia”, ku festivali do të mbyllet me serenatat korçare.
Risia e këtij edicioni është edhe prezantimi i xhazit në skenën e MIK Festival. Artisti Erkand Morina u shpreh se reagimi i publikut ishte shumë pozitiv, duke treguar se ky zhanër gjen gjithnjë e më shumë mbështetje edhe në Korçë.
Emocione të veçanta përjetoi edhe pianistja Ina Laço Petrollari, e cila tha se pjesëmarrja në festival ka një domethënie të veçantë për të, pasi do të interpretojë muzikën e Pandi Laços dhe do të nderojë kujtimin e Teodor Laços në qytetin e saj të lindjes.
Koncerti i parë u ndoq edhe nga turistë të huaj. Një vizitore nga Belgjika e cilësoi koncertin si “qershia mbi tortë” të udhëtimit të saj të parë në Shqipëri, ndërsa një tjetër turist nga Brukseli u shpreh se kishte ardhur posaçërisht për të shijuar muzikën xhaz.
Me një program që ndërthur muzikën klasike, xhazin, baletin dhe serenatat, MIK Festival synon edhe këtë vit ta kthejë Korçën dhe Devollin në qendra të rëndësishme të artit dhe kulturës. Koncertet do të vijojnë edhe në ditët në vijim, duke sjellë në skenë artistë shqiptarë dhe ndërkombëtarë, si dhe mbrëmje artistike në disa prej hapësirave më simbolike të rajonit.
