Një ekspozitë e veçantë fotografike me titull “Shqipëria e vitit 1921” është çelur në Galerinë e Arteve Digjitale në Korçë, duke sjellë para publikut fotografi të realizuara më shumë se një shekull më parë nga antropologu dhe akademiku zviceran Eugène Pittard.
Fotografitë dokumentojnë jetën e përditshme të shqiptarëve, kulturën, veshjet tradicionale dhe peizazhet e Shqipërisë së fillimshekullit XX, duke ofruar një dëshmi të çmuar historike dhe etnografike.
Kuratori i ekspozitës, Elton Koritari, vlerësoi figurën dhe kontributin e Pittard, duke theksuar rolin e tij në promovimin e Shqipërisë në arenën ndërkombëtare. Sipas Koritarit, studiuesi zviceran ka lënë një trashëgimi të rëndësishme jo vetëm përmes studimeve dhe fotografive, por edhe përmes angazhimit të tij humanitar dhe lidhjes së veçantë që krijoi me Shqipërinë.
Në ceremoninë e hapjes mori pjesë edhe ambasadorja e Zvicrës në Shqipëri, Ruth Huber, e cila e cilësoi ekspozitën si një dëshmi të marrëdhënieve të hershme dhe të qëndrueshme mes Shqipërisë dhe Zvicrës. Ajo vlerësoi figurën e Pittard si një personalitet që kontribuoi në njohjen dhe mbështetjen e Shqipërisë në një periudhë të rëndësishme historike.
Ekspozita ofron për vizitorët një udhëtim unik në kohë, duke rikthyer në vëmendje kujtesën historike dhe kulturore të vendit përmes objektivit të një studiuesi që e pa Shqipërinë me interes, respekt dhe admirim.
