Korça ka mirëpritur edicionin e tetë të festivalit “Shpirti i Ballkanit”, një aktivitet kulturor që po kthehet në traditë për qytetin juglindor. Për dy ditë me radhë, grupe artistike nga vende të ndryshme të Ballkanit kanë sjellë në Korçë kostume tradicionale, valle, këngë dhe elementë të pasur të trashëgimisë kulturore, duke krijuar një atmosferë festive për banorët dhe turistët.
Koreografi i njohur Ali Beli theksoi se Ballkani nuk është vetëm një nocion gjeografik, por një hapësirë e përbashkët kulturore ku popujt ndajnë tradita, ritme dhe elementë të ngjashëm folklorikë. Sipas tij, vallet tradicionale, si pogonishtja, janë një shembull i qartë i lidhjeve kulturore që bashkojnë popujt e rajonit.
Ndërkohë, drejtoresha e Qendrës së Artit dhe Kulturës, Blerta Belliu, u shpreh se festivali sjell ngjyra, folklor dhe promovim turistik për Korçën. Ajo veçoi bashkëpunimin e parë mes orkestrës simfonike të Korçës dhe asaj të Katerinit në Greqi, që sollën në skenë një program të përbashkët me muzikë shqiptare dhe greke.
Pjesëmarrësit e huaj vlerësuan mikpritjen korçare dhe theksuan ngjashmëritë kulturore mes vendeve të Ballkanit. Përfaqësues nga Greqia, Mali i Zi dhe Serbia u shprehën se arti, muzika dhe traditat janë ura që bashkojnë popujt përtej dallimeve.
Festivali “Shpirti i Ballkanit” bëri bashkë grupe artistike nga Greqia, Mali i Zi, Maqedonia e Veriut, Serbia, Bosnja dhe Shqipëria, të cilat performuan në pedonalen e Korçës, duke sjellë atmosferë festive dhe duke përcjellë mesazhin e bashkëjetesës përmes kulturës.
