Skënderbeu ka siguruar një vend në finalen e kampionatit kombëtar të volejbollit për meshkuj, pasi ka mposhtur bindshëm Tirana edhe në ndeshjen e dytë gjysmëfinale me rezultatin 3-0.
Skuadra korçare përsëriti suksesin e ndeshjes së parë, duke fituar setet me rezultatet 25-23, 25-19 dhe 25-22, në një përballje ku dominoi në momentet vendimtare.
Pas këtyre dy fitoreve, Skënderbeu avancon në finalen e “playoff”-it dhe tashmë pret kundërshtarin që do të dalë nga përballja e tretë mes Partizani dhe Erzeni.
Një rol të rëndësishëm këtë sezon kanë pasur edhe lojtarët e huaj, të cilët kanë rritur ndjeshëm nivelin e skuadrës. Mes tyre spikat pasuesi kilian Sebastian Albornoz Refusta dhe një diagonalist i kombëtares meksikane, që kanë bërë diferencën në fushë.
Kapiteni i Skënderbeut, Joan Sotir, u shpreh optimist për finalen:
“Ka shumë emocione, tifozeria na ka mbështetur shumë. Objektivi tani është të fitojmë trofeun. Ka ardhur momenti që Skënderbeu të shpallet kampion. Jemi të kompletuar dhe rezultatet e fundit e tregojnë këtë.”
Ndërsa lojtari kilian Sebastian Albornoz Refusta theksoi motivimin e skuadrës:
“Shpresojmë të bëjmë më të mirën në finale. Skënderbeu e kërkon prej kohësh këtë titull dhe ne jemi të motivuar. Në Korçë jam përshtatur shumë mirë dhe ndihem i vlerësuar.”
Prej dy sezonesh, skuadra e drejtuar nga trajneri Arben Prifti ka qenë konkurruese për trofetë kryesorë, por këtë sezon, falë përforcimeve cilësore, Skënderbeu konsiderohet si skuadra për t’u mundur në garën për titullin kampion.
