Pogradeci ka shkruar historinë në volejbollin shqiptar të femrave, duke u shpallur kampion i Shqipërisë pas një paraqitjeje mbresëlënëse në finalen vendimtare ndaj Tiranës. Vajzat liqenore triumfuan 3-0 në ndeshjen e pestë, duke vulosur një sezon të jashtëzakonshëm me titullin më të rëndësishëm.
Skuadra e drejtuar nga trajneri Besnik Lisha e nisi fuqishëm sfidën, duke fituar setin e parë 25-16. Tirana tentoi reagimin në setin e dytë, ku krijoi epërsi 8-13, por pogradecaret përmbysën gjithçka dhe e mbyllën edhe këtë set 25-20. Në setin e tretë, Pogradeci dominoi plotësisht, duke fituar 25-16 dhe duke shpërthyer festën në pallatin e sportit.
Me Bajraktaroviç në organizim dhe Johnson si një nga pikat më të forta në sulm, Pogradeci tregoi qetësi, forcë dhe nivel kampionesh. Nga ana tjetër, Tirana nuk arriti të gjejë ritmin e duhur, duke vuajtur mungesën e forcës në repartin ofensiv.
Pas ndeshjes, emocionet ishin të jashtëzakonshme. Bajraktaroviç u shpreh e mrekulluar për suksesin e parë në një ligë, ndërsa Johnson theksoi se nuk e kishte imagjinuar një arritje të tillë kur erdhi në Shqipëri. Kapitenia Paola Gjata deklaroi se skuadra nuk mund ta humbiste këtë mundësi përballë mbështetjes së jashtëzakonshme të tifozëve pogradecarë.
Trajneri Besnik Lisha vlerësoi punën e ekipit, duke theksuar se Pogradeci ishte ndërtuar për të qenë fitues.
Atmosfera në qytetin liqenor ishte elektrizuese, me tifozët që festuan gjatë këtë sukses historik. Ky sezon konfirmon dominimin absolut të Pogradecit në volejbollin shqiptar, pasi përveç titullit kampion, vajzat liqenore fituan edhe Ligën “Gjergj Kastrioti” dhe Kupën e Republikës, duke realizuar kështu tripletën e artë.
