Ambasadori i Prezencës së OSBE-së në Shqipëri, Michel Tarran, ka vlerësuar zhvillimin paqësor të protestave në vend, duke i cilësuar ato si një element normal të një shoqërie demokratike.
Në një deklaratë për mediat, Tarran u shpreh se është i kënaqur që prej më shumë se një muaji protestat janë zhvilluar pa incidente të rënda, duke respektuar të drejtën e qytetarëve për t’u shprehur.
“Protestat janë një aspekt normal i jetës demokratike dhe gëzohem që Shqipëria është bërë një vend ku protesta të tilla organizohen në mënyrë shumë qytetare dhe paqësore. Ka pasur disa incidente, por në përgjithësi, pas më shumë se një muaji, nuk ka pasur incidente të rënda”, tha ambasadori.
Duke komentuar edhe klimën politike në vend, ai theksoi se pluralizmi është një tipar i demokracisë, por nënvizoi se dialogu mes forcave politike mbetet një nga sfidat kryesore.
Sipas Tarran, fakti që në politikë ekzistojnë dy, tre apo më shumë pole është krejt normal, por dialogu politik në Shqipëri ende nuk është në nivelin e duhur.
