Hetime me metoda proaktive dhe kontrolle intensive nga Policia e Korçës kanë çuar në goditjen e një rasti të shpërndarjes së lëndëve narkotike në qytetin e Pogradecit.
Në kuadër të operacionit policor të koduar “Aktiviteti”, specialistët e Seksionit për Hetimin e Narkotikëve në DVP Korçë arrestuan në flagrancë shtetasin L. S., 54 vjeç, banues në Pogradec, me profesion zjarrfikës në Bashkinë Pogradec.
Sipas Policisë, 54-vjeçari përdorte lokalin që kishte në administrim, në lagjen nr.1 të Pogradecit, për të ushtruar aktivitetin e paligjshëm të shpërndarjes së lëndëve narkotike. Gjatë kontrollit në ambientet e lokalit, shërbimet e Policisë gjetën dhe sekuestruan një sasi lënde narkotike të dyshuar kanabis, një pjesë e së cilës ishte e ndarë në doza gati për shitje, një shumë parash që dyshohet se ishte përfituar nga kjo veprimtari, si edhe dy aparate celularë, të sekuestruara në cilësinë e provës materiale.
Materialet procedurale i janë referuar Prokurorisë së Korçës për veprime të mëtejshme ligjore.
Policia vijon punën për parandalimin dhe goditjen e veprimtarive kriminale në fushën e narkotikëve.
