Skuadra e Devollit, që garon në Kategorinë e Dytë të futbollit shqiptar, e nis sezonin 2025–2026 me një lajm pozitiv në aspektin financiar. Në mbledhjen e fundit të Këshillit Bashkiak është miratuar rritja e buxhetit vjetor, duke i shtuar fondit ekzistues 2 milion lekë të rinj.
Me këtë shtesë, buxheti total për sezonin arrin në 12 milion lekë, një mbështetje e konsiderueshme që do të ndihmojë klubin në përgatitjet për sezonin, por edhe në përballimin e kostove të udhëtimeve, pajisjeve dhe organizimit të ndeshjeve.
Presidenti i klubit, njëkohësisht edhe kryetar i Bashkisë së Devollit, Eduard Duro, ka lënë të hapur mundësinë për një shtesë tjetër buxhetore në muajin janar, nëse ekipi tregon rezultate pozitive dhe ecën drejt përmbushjes së objektivave të vendosura.
Ky angazhim institucional shihet si një hap domethënës jo vetëm për ecurinë sportive të ekipit, por edhe për nxitjen e të rinjve drejt futbollit, si një rrugë e shëndetshme dhe zhvilluese për komunitetin.
