Skënderbeu i volejbollit për femra është ndërtuar këtë sezon me një objektiv të qartë: rikthimin te titulli kampion.
Skuadra korçare, nën drejtimin e trajnerit Olsi Haxhillari, ka konsoliduar grupin e lojtareve, duke rikthyer në ekip disa prej volejbollisteve të njohura. Mes tyre është edhe Sara Malaj, ndërsa skuadra është përforcuar edhe me lojtare të huaja, që pritet të luajnë një rol të rëndësishëm në garën për trofe.
Për trajnerin Haxhillari, Skënderbeu, Pogradeci dhe Tirana janë ekipet që pritet të luftojnë për titullin kampion këtë sezon.
Një nga afrimet më të rëndësishme është amerikania Ramonni Cook, e cila do të veshë për herë të parë fanellën e Skënderbeut. Cook shprehet se objektivi i saj dhe i skuadrës është fitimi i kampionatit, ndërsa vlerëson pritjen që i është bërë në Korçë dhe ritmin e stërvitjeve.
Pas një sezoni te Tirana, Sara Malaj rikthehet te Skënderbeu. Volejbollistja korçare synon që rikthimi në skuadrën e qytetit të saj të shoqërohet edhe me një tjetër titull kampion.
Skënderbeu ka qenë një nga ekipet më të suksesshme të volejbollit shqiptar në vitet e fundit, me disa tituj kampionë dhe kupa të fituara. Pas dy sezonesh pa trofe, korçaret e rrjetës kërkojnë të rikthehen te suksesi dhe të sjellin sërish në Korçë trofeun e kampionatit.
