Një pjesë e konsiderueshme e tregtarëve që ushtrojnë aktivitetin në tregun “maqedonas” në qytetin e Korçë kanë ulur qepenat gjatë ditës së sotme, në shenjë proteste ndaj masave të ndërmarra nga Policia Bashkiake.
Sipas tregtarëve, shkak janë bërë gjobat e vendosura për mosrespektim të afateve lidhur me heqjen e tendave dhe reklamimin e mallrave në hapësirat publike. Ata pretendojnë se nuk kanë pasur mundësi të aplikojnë për procedurat përkatëse për shkak të mosfunksionimit të portalit e-Albania.
Disa prej tyre shprehen se situata ekonomike është rënduar ndjeshëm dhe se në këto kushte janë detyruar të mbyllin përfundimisht aktivitetin, duke e konsideruar emigrimin si të vetmen zgjidhje.
Ndërkohë, burime pranë Bashkisë së Korçë bëjnë me dije se prej disa ditësh tregtarët janë njoftuar për detyrimin e heqjes së tendave dhe lirimin e hapësirave publike. Sipas të njëjtave burime, ndaj subjekteve që nuk kanë zbatuar afatet janë marrë masa administrative nga Policia Bashkiake.
