Një aksident i rëndë automobilistik është regjistruar mesditën e sotme në aksin nacional Pogradec-Lin, në zonën e njohur si Pojskë, duke shkaktuar një viktimë dhe tre të plagosur.
Sipas informacioneve paraprake, një automjet tip “Golf” me targa të Maqedonisë së Veriut ka kryer një parakalim të gabuar, duke i prerë rrugën një automjeti tip “Benz” ku udhëtonte një familje nga Korça. Si pasojë, dy mjetet janë përplasur kokë më kokë me forcë të madhe.
Nga aksidenti ka humbur jetën një grua, pasagjere në automjetin me targa të Maqedonisë së Veriut. Ajo mbeti e bllokuar në mjet për më shumë se 20 minuta për shkak të deformimit të madh të karrocerisë. Pavarësisht ndërhyrjes së forcave zjarrfikëse, të cilat prenë derën e automjetit për ta nxjerrë, plagët e marra rezultuan fatale.
Tre persona të tjerë kanë mbetur të plagosur, dy prej tyre në gjendje më të rëndë. Të dëmtuarit janë transportuar në Spitalin e Pogradecit, ku po marrin ndihmën e nevojshme mjekësore, ndërsa po vlerësohet mundësia e dërgimit të tyre drejt Spitalit të Traumës në Tiranë.
Policia ndodhet në vendngjarje dhe po punon për zbardhjen e plotë të rrethanave të aksidentit.
