Skënderbeu ka siguruar kalimin në turin tjetër të Kupës së Shqipërisë, pas një fitoreje dramatike 2-1 ndaj Apolonisë, në një sfidë që u vendos vetëm në kohën shtesë.
Korçarët nuk arritën të gjenin rrugën e rrjetës gjatë 90 minutave të kohës së rregullt, ndërsa Apolonia surprizoi duke kaluar e para në avantazh në minutën e 94-t me anë të Sulos.
Megjithatë, skuadra e drejtuar nga Juljan Ahmataj reagoi dhe arriti të përmbyste rezultatin. Ndiaje barazoi shifrat në minutën e 104-t, ndërsa Drame shënoi golin e fitores në minutën e 116-t, duke i dhënë Skënderbeut biletën për në fazën tjetër të kompeticionit.
Ndërkohë, në ndeshjen tjetër të zhvilluar këtë të martë, Laçi fitoi bindshëm 3-0 ndaj Shirokës. Golat për kurbinasit u shënuan nga Tola në minutën e 13-të, Nerguti në të 71-ën dhe Bibo në të 80-ën.
Kështu, Skënderbeu dhe Laçi janë dy skuadrat e para që sigurojnë kualifikimin nga turi i dytë i Kupës së Shqipërisë.


