Sezoni turistik është çelur zyrtarisht në bashkinë e Pustecit, një nga destinacionet më të veçanta turistike të juglindjes së Shqipërisë. Parku Kombëtar i Prespës po tërheq çdo vit e më shumë vizitorë, veçanërisht turistë të huaj, të cilët mbeten të mahnitur nga natyra, liqeni i Prespës, ishulli i Maligradit dhe gatimet tradicionale të zonës.
Vizitorë nga vende të ndryshme europiane po zgjedhin Pustecin si destinacion për të kaluar disa ditë mes qetësisë dhe bukurive natyrore. Turistët vlerësojnë mikpritjen e banorëve, ndërsa operatorët turistikë konfirmojnë një rritje të ndjeshme të numrit të të huajve vitet e fundit.
Sipas tyre, vizitorët vijnë kryesisht nga Gjermania, Franca, Holanda dhe vende të tjera europiane, duke preferuar turizmin natyror, kampingun buzë liqenit dhe gatimet tradicionale, ku peshku i Prespës mbetet produkti më i kërkuar.
Kryetari i Bashkisë së Pustecit, Pali Kolefski, shprehet se banorët e zonës janë ndërgjegjësuar për rëndësinë e turizmit dhe po investojnë gjithnjë e më shumë në bujtina, akomodime dhe shërbime për vizitorët.
Ishulli i Maligradit, fshatrat Zaroshkë, Gollomboç, Goricë dhe muzeu i Sterjo Spasse janë vetëm disa nga atraksionet që e bëjnë Prespën një nga destinacionet më të kërkuara nga turistët e huaj që vizitojnë juglindjen e vendit. Me rritjen e fluksit të vizitorëve dhe investimeve në sektorin privat, Pusteci po konsolidohet si një nga pikat më të rëndësishme të turizmit natyror në Shqipëri.
