Agjencia e Mbikëqyrjes Policore (Rajoni Elbasan – Korçë) ka arrestuar në flagrancë punonjësin e policisë, Inspektor D. O., me detyrë Trupë Shërbimi në Stacionin e Policisë Kufitare Pogradec, i dyshuar për kryerjen e veprës penale “Drejtim i automjeteve në mënyrë të parregullt”.
Arrestimi u krye pasi mbrëmjen e djeshme, rreth orës 22:31, efektivi, duke drejtuar mjetin e tij në rrugën “Rinia” në Pogradec, është përfshirë në një aksident rrugor, duke dëmtuar pesë automjete të parkuara.
Pas testimit me aparatin matës të alkoolit, rezultoi pozitiv me 1.36 mg/l dhe 1.33 mg/l, nivele shumë mbi kufirin e lejuar.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
