Për të gjashtin vit radhazi, arkeologë shqiptarë dhe të huaj po vijojnë kërkimet në sitin palafit Lin 3, në bregun e Liqenit të Ohrit.
Gjatë këtij viti, kërkimet kanë konfirmuar një sipërfaqe prej rreth 6 hektarësh, duke e renditur Lin 3 ndër sitet palafite me sipërfaqen më të madhe të njohur në Ballkan.
Bashkëdrejtuesi i projektit, Martin Hinz nga Universiteti i Bernës, e cilëson Lin 3 një prej siteve më të rëndësishme për studimin e prehistorisë së Shqipërisë dhe Europës. Sipas tij, vendbanimi daton nga rreth 5800 deri në 4000 para Krishtit, duke përfaqësuar rreth 2 mijë vjet histori banimi.
Një pjesë e vendbanimit ndodhet në tokë, ndërsa pjesa tjetër nën ujërat e Liqenit të Ohrit. Kjo ka mundësuar ruajtjen e mirë të materialeve organike, përfshirë drurin dhe mbetjet bimore.
Këtë vit, kërkimet janë përqendruar kryesisht në zonën nënujore, të kombinuara me studime gjeofizike, me synim përcaktimin më të saktë të shtrirjes dhe strukturës së vendbanimit.
Kampionet e marra nga sedimentet do të analizohen në laboratorë në Bernë, Oksford, Kiel dhe Kopenhagë, për të sjellë të dhëna të reja mbi jetën dhe zhvillimin e komuniteteve të hershme që kanë banuar në këtë zonë.
Sipas studiuesve, rëndësia e Lin 3 lidhet edhe me procesin e përhapjes së bujqësisë në Europë. Ballkani konsiderohet një nga rrugët përmes së cilës bujqësia u përhap nga Anatolia drejt Europës, ndërsa zona e Linit mund të ketë luajtur një rol në përshtatjen e saj me kushtet klimatike të rajonit.
Vendbanimi palafit i Linit ka ofruar të dhëna të rëndësishme për historinë e banimit në zonë, nga Neoliti i Mesëm deri në Eneolit. Kërkimet pritet të vijojnë edhe në vitet e ardhshme, përmes gërmimeve dhe metodave të tjera shkencore.
Siti i Lin 3 është pjesë e trashëgimisë arkeologjike të lidhur me Liqenin e Ohrit, i cili është pjesë e Listës së Trashëgimisë Botërore të UNESCO-s.
