Më shumë se 50 piktorë nga trevat shqipfolëse janë bërë pjesë e ekspozitës së pranverës që është çelur në qytetin e Korçës. Në këtë ekspozitë marrin pjesë artistë nga Shqipëria, Kosova, Maqedonia e Veriut dhe Mali i Zi.
Sipas kuratorit Fatos Bylykbashi, një ekspozitë kaq gjithëpërfshirëse rikthehet pas shumë vitesh, duke sjellë një frymë të re dhe duke bashkuar artistë nga të gjitha trevat shqiptare në qytetin e Korçës.
Fatos Bylykbashi u shpreh se kjo ekspozitë është një rikthim i rëndësishëm për jetën artistike, pasi prej vitesh nuk organizohej një aktivitet i tillë i përmasave të gjera dhe që përfshin artistë nga të gjitha trevat shqipfolëse.
Piktori Abdullah Gjongecaj merr pjesë për herë të parë në një ekspozitë të tillë në Korçë dhe vlerëson rëndësinë e saj për artistët, të cilët përmes veprave të tyre ballafaqohen dhe prezantojnë stilin dhe identitetin artistik.
Sipas tij, ekspozitat kolektive janë një sfidë për çdo artist, pasi e vendosin atë përballë përgjegjësisë për të sjellë zërin dhe stilin e tij përmes veprës.
Edhe piktori korçar Spartak Kasuli thekson se ballafaqimi me artistë nga trevat e tjera shqiptare rrit përgjegjësinë dhe nivelin artistik të secilit pjesëmarrës.
Ai shton se kjo ekspozitë sjell një risi pasi përfshin artistë nga të gjitha trevat shqipfolëse, ndërsa rikthimi i aktiviteteve të tilla i bën mirë jetës kulturore të qytetit dhe komunitetit të artistëve.
Në ekspozitën “Pranvera” janë bërë bashkë piktorë, skulptorë dhe fotografë nga trevat shqipfolëse.
