Drejtori i Përgjithshëm i Policisë së Shtetit, Drejtues Madhor Ilir Proda, ka nderuar dy punonjës të Policisë së Komisariatit të Korçës me Certifikatën e Karrierës, me rastin e daljes së tyre në pension.
Të vlerësuarit janë:
• Inspektor Fazlli Mersinllari, oficer i Patrullës së Përgjithshme.
• Inspektor Lulëzim Gjiriti, ndihmës specialist i Policimit në Komunitet.
Ceremonia u zhvillua në ambientet e Komisariatit të Policisë Korçë, ku morën pjesë drejtues dhe efektivë të strukturave vendore.
Drejtori i DVP Korçë, Drejtues Islor Islami, në emër të Drejtorit të Përgjithshëm dhe kolegëve, vlerësoi kontributin e dy efektivëve, duke theksuar se ata kanë mbi 35 vite shërbim në radhët e Policisë së Shtetit dhe janë dalluar për përkushtim, korrektësi dhe profesionalizëm, duke arritur rezultate të larta gjatë gjithë karrierës.
Të nderuarit falënderuan Policinë e Shtetit për respektin dhe vlerësimin e treguar, duke u shprehur mirënjohës për bashkëpunimin ndër vite.
DVP Korçë uron të dy efektivët për pensionimin e merituar dhe falënderon kontributin e tyre të çmuar në shërbim të komunitetit.
