Humbja përballë Teutës ka sjellë reagimin e trajnerit të Skënderbeut, Juljan Ahmataj, i cili ka ngritur shqetësime për lojën e ashpër të kundërshtarëve dhe ndërhyrjet që, sipas tij, nuk ndëshkohen në kohë nga gjyqtarët.
Në prononcimin pas ndeshjes për RTSH, Ahmataj u shpreh se skuadrat kundërshtare po përpiqen të ndalin lojën e shpejtë të korçarëve përmes faulleve, ndërsa theksoi se në ndeshjet ndaj Skënderbeut janë dhënë shpesh kartonë të kuq, por në fund të takimeve.
“Rezultatet kanë munguar, por nuk na përballojnë dot dhe mundohen me faulle që nuk ndëshkohen. Po shohim çudira”, deklaroi trajneri.
Ahmataj foli edhe për vështirësitë e skuadrës në këtë fillim sezoni, duke theksuar se Skënderbeu është një ekip i ri, që ka nevojë për kohë për të krijuar harmoninë mes lojtarëve. Sipas tij, fakti që pesë nga gjashtë ndeshjet e zhvilluara janë luajtur në transfertë, e ka vështirësuar më tej situatën.
Trajneri nënvizoi gjithashtu se reparti i mbrojtjes ka nevojë për më shumë kohë për t’u konsoliduar, ndërsa besimi dhe rezultatet pritet të vijnë gradualisht me zhvillimin e ndeshjeve të radhës.
