Një tjetër rast abuzimi me rrjetin e furnizimit me ujë të pijshëm është konstatuar nga Ujësjellës Kanalizime Korçë gjatë kontrolleve të kryera në kuadër të aksionit kundër lidhjeve të paligjshme.
Në fshatin Lumalas, specialistët e UK Korçë zbuluan një ndërhyrje të jashtëligjshme në tubacionin kryesor të ujësjellësit, përmes së cilës një person kishte realizuar furnizimin në mënyrë të paligjshme. Ndaj tij është marrë masa e procedimit penal, ndërsa materialet janë referuar pranë Prokurorisë së Korçës, pranë Gjykatës së Shkallës së Parë të Juridiksionit të Përgjithshëm.
Ujësjellës Kanalizime Korçë bën me dije se aksioni për zbulimin dhe ndërprerjen e lidhjeve të paligjshme do të vijojë edhe në ditët në vijim, pa asnjë tolerim për ata që abuzojnë me ujin e pijshëm, duke dëmtuar rrjetin dhe krijuar probleme për furnizimin normal të qytetarëve.
Ndërhyrjet e paautorizuara në rrjetin e ujësjellësit përbëjnë shkelje të rënda, që ndëshkohen sipas ligjit, qoftë me gjoba administrative, qoftë me ndjekje penale në varësi të rastit.
UK Korçë apelon për ndërgjegjësim dhe bashkëpunim të qytetarëve për të garantuar një shërbim të drejtë dhe të sigurt për të gjithë.
