Korça u shndërrua për dy netë me radhë në një qendër të vërtetë feste dhe adrenaline përmes organizimit të “Korça Moto & Rock Festival”.
Aktiviteti mblodhi qindra motoristë nga Shqipëria dhe vende të ndryshme të rajonit, duke sjellë në qytet një atmosferë të veçantë për banorët dhe vizitorët. Paradat e motorëve në rrugët e Korçës, ekspozimi i modeleve të ndryshme dhe koncertet rock me performanca live tërhoqën vëmendjen e publikut, i cili ndoqi me interes të madh të gjitha aktivitetet e festivalit.
Një nga risitë e këtij edicioni ishte pjesëmarrja për herë të parë e makinave amerikane në paradën festive, duke i shtuar më shumë spektakël dhe larmi eventit.
Muzika, energjia dhe pasioni për motorët dhe automjetet ikonike u ndërthurën në një ngjarje që promovoi Korçën si një destinacion të rëndësishëm për evente kulturore dhe turistike.
Organizatorët e vlerësuan pjesëmarrjen e lartë dhe interesin e treguar nga komuniteti i motoristëve dhe pronarët e automjeteve klasike, duke e konsideruar festivalin një sukses dhe duke shprehur synimin për ta kthyer në një traditë të përvitshme për qytetin.
