Policia e Korçës ka vënë në pranga 3 shtetas, njëri për tentativë vrasjeje dhe dy të tjerë për vjedhje.
Në pranga u vu Bujar Rizvani, 59 vjeç, banues në Korçë, pasi dyshohet se gjatë një konflikti për motive të dobëta në lagjen nr. 6 ka tentuar të godasë disa herë me thikë një 60-vjeçar. Ky i fundit mbeti i dëmtuar dhe u dërgua në spitalin e Korçës për mjekim, jashtë rrezikut për jetën. Në vendngjarje u sekuestrua edhe mjeti prerës (thikë) i përdorur në ngjarje.
Po ashtu, shërbimet e Policisë arrestuan në flagrancë Eri Hajdinllarin, 18 vjeç dhe një 17-vjeçar, të dy banues në Korçë, të dyshuar për veprën penale “Vjedhja”, kryer në bashkëpunim. Ata u kapën në një magazinë në lagjen nr. 17 duke vjedhur mjete pune, vegla dhe materiale ndërtimi.
Nga verifikimet rezultoi se dy të rinjtë dyshohet se më 3 mars 2026 kanë vjedhur edhe disa tuba metalikë në banesën e një 56-vjeçareje në lagjen nr. 7.
Materialet procedurale i janë referuar Prokurorisë së Korçës për veprime të mëtejshme.
