Drejtoria Vendore e Policisë Korçë ka referuar disa materiale procedurale në Prokurori, ku kanë nisur procedime penale për një sërë shtetasish të përfshirë në konflikte fizike, veprimtari të paligjshme dhe shkelje të tjera.
Specialistët për Hetimin e Krimeve të Komisariatit të Policisë Korçë filluan procedimin penal për shtetasit M. A., 18 vjeç, F. V., 18 vjeç, Dh. J., 23 vjeç, Th. K., 18 vjeç, A. S., 18 vjeç, si edhe për 5 shtetas të mitur, pasi në lagjen nr. 7, Korçë, janë përfshirë në një konflikt fizik me njëri-tjetrin, për motive të dobëta, duke prishur qetësinë publike. Gjatë kontrollit fizik, dy prej të miturve u kapën me përforcuese grushti, të cilat u sekuestruan si provë materiale.
Po ashtu, nisi procedimi penal për shtetasin G. S., 54 vjeç, banues në Korçë, pasi gjatë kontrollit në lokalin që kishte në përdorim, në celularin e tij u gjetën faqe për baste sportive. Pajisja u sekuestrua në cilësinë e provës materiale.
Procedim penal filloi edhe për shtetasin A. P., 41 vjeç, i cili u konstatua duke kryer punime ndërtimi pa leje.
Ndërkohë, specialistët e Komisariatit të Policisë Pogradec referuan materialet për një 14-vjeçare, banuese në fshatin Vërdovë, e cila gjatë një konflikti për motive të dobëta dyshohet se ka dëmtuar lehtë me mjet prerës (thikë) një bashkëmoshatare.
Nga ana tjetër, specialistët e Komisariatit të Policisë Maliq nisën procedim penal për shtetasin M. V., 25 vjeç, banues në Maliq, pasi dyshohet se është konfliktuar fizikisht me një 21-vjeçar.
Materialet procedurale i kaluan Prokurorisë së Korçës për veprime të mëtejshme.
