Kolonja po shndërrohet gjithnjë e më shumë në një destinacion të preferuar për turistët e huaj, falë kombinimit të natyrës së paprekur, traditës dhe kulinarisë autentike. Përveç vizitës në monumentet e trashëgimisë kulturore dhe peizazhet malore, vizitorët kanë mundësinë të përjetojnë nga afër traditat vendase, duke mësuar të gatuajnë receta karakteristike të zonës, si lakrori.
Turistët francezë, të cilët këtë sezon janë ndër vizitorët më të shumtë në Kolonjë, shprehen të mahnitur nga mikpritja, ushqimet bio dhe bukuritë natyrore të zonës.
“Për ne ishte një përvojë e mrekullueshme të mësonim të gatuanim lakrorin dhe të shihnim gratë teksa përgatisnin ushqimin. Ajo që na pëlqen më shumë është ushqimi bio, natyra e paprekur dhe mikpritja e njerëzve”, u shpreh një prej turistëve.
Një tjetër vizitor tha se ishte hera e parë që vizitonte Shqipërinë, pas një turi në disa qytete të vendit.
“Jemi mrekulluar nga mënyra se si na keni pritur. Sajtet arkeologjike, natyra dhe sidomos ushqimi na kanë lënë mbresa. Besoj se do të rikthehemi sërish”, tha ai.
Sipas guidës turistike Klejdi Shtrembi, vizitorët e huaj po orientohen gjithnjë e më shumë drejt turizmit të gjelbër dhe eksperiencave autentike.
“Turistët mahniten nga gjelbërimi dhe natyra e egër e Kolonjës. Ata provojnë me kënaqësi gatimet tradicionale dhe vlerësojnë faktin që çdo zonë e Shqipërisë ka një kulinari të veçantë”, shprehet ai.
Mes peizazheve malore, traditave të ruajtura dhe shijeve autentike, Kolonja po fiton gjithnjë e më shumë vëmendjen e turistëve të huaj, duke u kthyer në një nga destinacionet më tërheqëse të turizmit të gjelbër dhe atij kulinar në juglindje të Shqipërisë.
