Liqeni i Pogradecit është kthyer në një stacion të përkohshëm për flamingot gjatë shtegtimit të tyre sezonal. Shpendët mbërrijnë kryesisht në periudhat e vjeshtës dhe pranverës, duke e përdorur liqenin si një pikë pushimi përpara se të vijojnë udhëtimin drejt habitateve të tjera.
Sipas specialistit Gani Bego, flamingot vijnë kryesisht nga jugu i Evropës dhe Turqia, ndërsa qëndrimi i tyre në liqenin e Pogradecit zgjat nga disa ditë deri në një ose dy javë. Kryesisht bëhet fjalë për individë të rinj, të cilët e përdorin këtë territor si një ndalesë gjatë migrimit drejt lagunave bregdetare të Shqipërisë, si Narta dhe Divjakë-Karavastaja, ku kalojnë edhe dimrin.
Një nga faktorët që favorizon praninë e tyre është tërheqja sezonale e nivelit të ujit, e cila ekspozon sipërfaqet ranore përgjatë bregut dhe krijon kushte të përshtatshme për sigurimin e ushqimit. Zona nga ish-vila deri në Drilon ofron një habitat të përshtatshëm për këta shpendë, ndërsa prania e tyre mund të lidhet edhe me ndryshimet klimatike të viteve të fundit.
Përveç rëndësisë për biodiversitetin dhe veçantisë që i japin peizazhit të liqenit, flamingot janë kthyer edhe në një atraksion për turistët dhe vizitorët. Të shumtë janë ata që ndalojnë përgjatë bregut për të vëzhguar dhe fotografuar këta shpendë të veçantë, duke i dhënë një tjetër bukuri natyrore Pogradecit.
