Dinamo rikthehet në kampionat pas mbylljes së aventurës europiane dhe tashmë e ka të gjithë fokusin te Abissnet Superiore. Blutë do të përballen të hënën në mbrëmje me Skënderbeun në “Elbasan Arena”, në sfidën e javës së dytë.
Në prag të takimit, trajneri Ilir Daja analizoi situatën e skuadrës, duke pranuar se lodhja pas 120 minutave të luajtura në Conference League mund të ndikojë në përgatitjen për këtë ndeshje
Daja e cilësoi aventurën europiane si një tjetër arritje për Dinamon, ndërsa tani kërkon që skuadra të rikthehet te rezultatet pozitive në kampionat.
“Rikthehemi në kampionat dhe e dimë që është e vështirë, pasi kemi luajtur 120 minuta para tre ditësh. Duhet të menaxhojmë sa më mirë energjitë për të qenë efikasë ndaj Skënderbeut”, u shpreh tekniku.
Trajneri kryeqytetas vlerësoi edhe kundërshtarin, i cili është rikthyer këtë sezon në elitën e futbollit shqiptar dhe e nisi kampionatin me një barazim ndaj Vllaznisë.
“Skënderbeu është një vlerë e shtuar për Superiore. Ata vijnë pas një barazimi që u ka dhënë një dozë të mirë psikologjike. Për këtë arsye, ndeshja duhet vlerësuar në maksimum”, deklaroi Daja.
Sa i përket gjendjes së skuadrës, Dinamo ka dy lojtarë të prekur nga viruset e stinës, ndërsa Aliji nuk do të jetë i gatshëm për sfidën e së hënës. Pjesa tjetër e grupit është në dispozicion të trajnerit.
