Viti i ri shkollor në qarkun e Korçës nis me një rënie të ndjeshme të numrit të nxënësve. Nga 21,080 që ishin vitin e kaluar, këtë vit janë regjistruar vetëm 17,354 nxënës – pra 3,726 më pak.
Sipas Sindikatës së Pavarur të Arsimit në Korçë, kjo është një shifër alarmante, por e pritshme, pasi fenomeni i rënies së numrit të nxënësve ka nisur prej vitesh dhe pritet të thellohet edhe më shumë në vitet pasuese.
Më të prekura janë klasat e para, ku mungesa e fëmijëve është vënë re prej dy vitesh. Ekspertët paralajmërojnë se kjo do të reflektohet gradualisht edhe në arsimin 9-vjeçar e më tej në gjimnaze. Shkaqet kryesore lidhen me emigracionin e të rinjve dhe me uljen e ndjeshme të lindshmërisë në vend.
Problemet nuk kufizohen vetëm në zonat rurale, por prekin edhe qytetin e Korçës. Tre shkolla të njohura të qytetit – “Naim Frashëri”, “Ismail Qemali” dhe “Asdreni” – këtë vit janë në kufirin minimal të numrit të nxënësve për të pasur status të plotë shkolle, duke rrezikuar që në të ardhmen të kthehen në shkolla vartëse.
