Detaje të reja janë zbardhur nga ngjarja e rëndë e dhunës në familje, e ndodhur në lagjen 1 të qytetit të Pogradecit, ku një 69-vjeçare mbeti e plagosur rëndë pas një konflikti me bashkëshortin e saj.
Muhamet Shembilko, 78 vjeç, dhe Sherife Shembilko, 69 vjeçe, jetonin vetëm në banesën e tyre, ndërsa dy fëmijët e çiftit ndodhen në emigracion.
Sipas informacioneve paraprake, kanë qenë fqinjët ata që kanë njoftuar Policinë pasi kanë dëgjuar zhurma që vinin nga banesa. Me mbërritjen në vendngjarje, efektivët gjetën 69-vjeçaren të plagosur rëndë, me dëmtime serioze në kokë.
Nga veprimet e para hetimore dyshohet se 78-vjeçari e ka goditur bashkëshorten me një shkop në pjesën e pasme të kokës, duke i shkaktuar plagë të rënda.
E plagosura u transportua fillimisht në Spitalin e Pogradecit, ndërsa më pas, për shkak të gjendjes së rëndë shëndetësore, u dërgua me helikopter drejt Spitalit të Traumës në Tiranë për mjekim të specializuar.
Ndërkohë, 78-vjeçari është shoqëruar nga Policia, e cila po vijon hetimet për të sqaruar plotësisht rrethanat dhe motivin e kësaj ngjarjeje.
