Gazetari i televizionit Euronews Albania për qarkun e Korçës, Xhensil Shkëmbi, është shpallur “Personazhi Korçar i Vitit 2025”, përmes votave (pëlqimeve) të ndjekësve të medias Korça Plus.
Gjatë këtij viti, Shkëmbi është shquar për trajtimin dhe ngritjen e çështjeve të rëndësishme që prekin drejtpërdrejt komunitetin. Një nga rastet më të forta ishte denoncimi i skandalit të shantazhimit të të rinjve përmes një faqeje anonime, e cila kishte shkaktuar pasoja të rënda psikologjike, deri në tentativa vetëvrasjeje. Gazetari u bë zëri i të rinjve, duke kontribuar në identifikimin dhe vënien para përgjegjësisë ligjore të autorëve.
Po ashtu, Xhensil Shkëmbi ka qenë një zë i fuqishëm në ndihmë të familjeve në nevojë në qarkun e Korçës, ku dhjetëra raste kanë gjetur zgjidhje dhe mbështetje konkrete falë ndërhyrjeve të tij mediatike.
Në muajin nëntor, ai u përplas publikisht me Ministren e Arsimit lidhur me ligjin për barazinë gjinore, ndërsa pak kohë më pas, solli në vëmendje mungesën e dëmshpërblimeve për fermerët, duke vënë para përgjegjësisë Ministrin e Bujqësisë.
Një tjetër histori që preku opinionin publik ishte ajo e familjes nga Këmbëthekri në Maliq, ku katër fëmijë shkonin në shkollë mbi kalë. Pas denoncimit, familjes iu sigurua një automjet i sigurt. Gjithashtu, Shkëmbi solli në vëmendje historinë tragjike të familjes Lato në fshatin Gjonomadh, mes përdhunimeve, vetëvrasjes, dhunës familjare dhe varfërisë ekstreme.
Angazhimi i tij ka vijuar edhe në organizimin e aktiviteteve për fëmijët me autizëm dhe fëmijët me aftësi ndryshe, si dhe në shpërndarjen e dhuratave të fundvitit në zonat e thella malore.
Mik i medias Korça Plus prej vitesh, përmes denoncimit të problematikave të shumta të qarkut, Xhensil Shkëmbi vlerësohet për kontributin e tij të vazhdueshëm në shërbim të komunitetit.
Korça Plus e vlerëson dhe e shpall Xhensil Shkëmbin “Personazh i Vitit 2025” në Korçë.
Urime!
