Mbledhja e thirrur jashtë radhe nga këshilltarët e opozitës në Këshillin Bashkiak të Maliqit është shoqëruar me debate të forta dhe tone të ashpra nga fermerët e pranishëm në sallë.
Fermerët kanë ngritur shqetësimin për humbjet e mëdha të prodhimeve bujqësore, si pasojë e përmbytjes së tokave. Sipas tyre, dëmet janë të konsiderueshme dhe kërkojnë dëmshpërblim, duke theksuar se kjo situatë është e përsëritur dhe jo hera e parë që tokat e tyre përmbyten.
Në mbledhje, këshilltari i opozitës Yllson Brahimllari u shfaq veçanërisht i ashpër, duke cituar deklarata të kryeministrit Edi Rama të vitit 2011 lidhur me dëmshpërblimet për përmbytjet. Sipas Brahimllarit, e njëjta qasje dhe përgjegjësi duhet të mbahen edhe sot për fermerët e prekur.
Nga ana tjetër, kryetari i Këshillit Bashkiak të Maliqit, Ornild Demollari, u shpreh se kryeministri Rama ka bërë një deklaratë lidhur me situatën dhe për fermerët që kanë pësuar dëme nga përmbytjet, duke nënvizuar se çështja është në vëmendje të institucioneve përgjegjëse.
Sipas të dhënave të paraqitura, në fushën e Maliqit janë përmbytur rreth 4 mijë hektarë tokë bujqësore, ku sipërfaqet më të mëdha të prekura ndodhen në zonën torfike. Situata vijon të mbetet shqetësuese për fermerët, të cilët kërkojnë zgjidhje konkrete dhe të shpejta.
